Lu cunto re la Ianàra

Putìa tené no chiù re... cingo o sei anni quanno ‘na sera... ‘n’gapo a ró fuoco... nonno Tóre,

lo patre re patrimo, se n’ assétte pè ‘na trovàta : “Uagliù... è ora ca vi fazzo certi cunti”.

L’ aìa pe me e pe fratimo Prieto... lo gruosso.

‘Ngi uardàmmo ‘n’facci e no capìamo re quali cunti ulìa parlà nonno quéra sera ! Continuào :

“Nonnimo ró contào a me e mo io lo cónto a bui... Ma ui sapìti chi è lo Lupo Mannàro ?”

Fratimo subito responnétte : “E certo ca ró saccio ! ...è chi è nato a mezzanotte re li vintiquatto re Recémbre”.  Io era piccirìllo... e sta cosa nó l’ aìa mai sintùta rice prima.

Ca pò... chi era sto lupo mannàro ? ...penzàva. Nonno Tore uardào ‘n’facci a fratimo

gruósso e l’ addimmannào:  “...e dimmi: ... pecché lo chiamano Lupo Mannaro ?”

Fratimo, ca non saccio cómme facìa a sapè certe cose, li responnètte : “Lo chiamano accussì pecché... quanno ‘ng’è la luna chiéna... quiro ca è nato

lupo mannàro addeventa tutto pilùso e si trasforma rindo a ‘nó lupo... e bbai giranno pe tutta la notte... e accìre tutti quiri ca trova pé nnandi !”.

A sente ste cose m’ impressionài e m’ arrecordo ca mi tirài re cosce ‘nbiétto...

m’arrognài e mi faciétti picciolo picciolo. Mi venette ‘na paura ! ...puro pecché  ‘ng’era no silenzio rindo a la stanzia;

Si quaccherùno m’ aésse roddrecàto tanno... ré sicuro aésse zompato pé l’ aria comma a na atta.

Pò... nonnimo continuào : “E visto ca fai tanto lo  sapùto... mi sai rice si lo lupo mannàro è mascolo

o femmena ?”  Prieto restào cómma a nó fessa e si virìa ca sta cosa no la sapìa.

Mango io ‘ngi’ aìa pensato a sta cosa !  Fratimo... nó poco contrariato responnètte :

 “E che ne saccio ! ...potèsse mascolo o femmena ... si è mascolo è lupo e si è femmena è lupa !

...ma tu che bbai trovanno moséra !”. Calào no silenzio ... io m’ era arrognàto

‘ngimma a quera seggia e guardava a nonno ca pippiava e anneolava la stanzia.

Prieto continuào : “Ma pecché...si è femmena non potèsse na lupa ?!”. “None” responnette nonno.

Prieto quasi ‘ngazzato rice : “...e si non è lupa... che è ?”

“E’ na Ianàra” recette nonno Tore e continuào : “Si chiama Ianàra...e quera no bai giranno re notte per fòre, ma trase rindo a re casi e s’ arròbba re criature !”.

Mi schiaffào morbo ! Mi pigliào na paura e già sapìa ca la notte non aésse potuto rorme.

Fratimo, ch’ aìa fatto lo sapùto fino a tanno aètte ammette ca sta cosa no la sapìa.

Ma nonno Tóre continuào : “E bui sapìti come si face pe nó fa trasì na Ianàra rindo a la casa o rindo a na stanzia ?”.

Io e fratimo ni uardammo ‘n’facci pé n’ attimo e subito girammo la facci... pé annasolà che

ni ricìa nonno. Isso sapìa ca nui ulìamo sapé e continuào : “Pé nó fa trasì na Ianàra s’ adda mette, annandi a la porta, quaccosa ca essa adda contà prima re trase.

L’ adda contà a uno a uno e ‘ngi’adda mette tanto tiempo pe contà... ca face iuòrno

e s’ adda arritirà. La Ianara però, aìti sapè, ca non è pelosa, non è nó lupo... ma è na STREGA !”

Quanno sintietti quera parola Strega mi venette ré scappà. Meno male ca non era sulo rindo a quera stanzia ! ...ma mi venette spontaneo r’ annaccoà la capo miezzo a ré cosce.

Subito roppo sintietti : “Embè... mo iativi a corcà....moséra v’ aìti ‘mbaràto quaccósa.”.

Accussì m’ aizài e ‘nziemo a fratimo ne ne iémmo a corcà.

Mi ‘nfrorchiài  sotta a ré coperte e stranamente, quasi subito, m’ addurmiètti.

“Nicó.... Nicó...” – mi sintietti chiamà ma no birìa nienti... l’ uocchi erano apierti ma virìa tutto scuro.

“Senza ca t’ annaccùi...pe mó non te ne porto pé me...t’ aggio sulo vinùta a ddice ca t’ ara preparà.

Fra iusto sette iuòrni torno e te ne porto pé me.”

Io no riuscìa a capisce chi putìa esse.  “Nicó...ma tu m’ ha sintuta o no ?! Iéssi ra loco sotta.”

Assiètti pe la capo ra sotta a ré coperte... e tanno la virietti !!

Era proprio na strega ! Mai visto na vecchia chiù brutta re quera. Scignàta... pé li capilli niuri e luonghi... no maccatùro ‘n’gapo e rirìa. Rirìa có la occa aperta...scignata e pé na scopa mano. Io non mi putìa move pé la paura. “Nicó...tu ha capito ?

Io ti vengo a piglià iusto fra sette iuòrni... fatti trovà pronto... si no mi ‘ngazzo... ti ‘nghiùro rindo a nó sacco... ti porto ‘ngimma a lo ponte re la Chiazza e ti ótto abbascio !”.

La Ianàra accommenzào a rire chiù forte e io mi rescetài. Era tutto suràto e nó chiuriètti uocchi fino a che non facètte iuòrno. Erano ré nove ré la matìna quanno arrivào mamma ca mi recètte ca si non m’ aisàva re subbito... mi facìa na paliàta.

Quera semmàna passào có lo stesso pensiero, tutti li iuòrni, rindo a la capo. Io non putìa rice niendi a nisciuno. Sapìa ca era stato no suonno, ma a me mi parìa no suonno proprio vero ! E pó...aìa visto ‘ngimma a lo calannario ca la notte ch’ aìa ritto ca vinìa la Ianàra, era proprio na notte re luna chiena. Putìa mai esse na coincidenza ?! E la notte re luna chiena arrivào.

Prima re mi ì a corcà sintietti mamma ca parlava có patrimo : era ‘ngazzàta pecché mancavano cingo pacchi re sale roppio... ogni ghiuòrno n’era sparuto uno e essa nó riuscìa a capisce chi era ca si putìa fótte ró sale. Io sapìa li fatti mia !

Mi iètti a corcà e subbito roppo arrivào Prieto. Io faciètti a bberè ca già rurmìa e fratimo, mango posào la capo ‘ngimma a lo cuscino ca accommenzào a ronfà.

M’ aizài e citto citto aprietti lo tarraturo e tirài fore li cingo pacchi ré sale roppio.

Rindo a la stanzia si virìa tutto pecchè ‘ng’era na bella luna chiena ca facìa luce. M’ abbiài a la porta ma mi venette a mente : la fernèstra ! ...e si trase ra la fernèstra ?! ...pensai.

Accussì iétti a raprì prima la fernèstra, ma questa era sembe stata refettòsa e facètte rumore.

Fratimo si rescetào : “Ma fussi fessa Nicó ! ...chiùri sta fernèstra e ba ti córca” mi recètte.

Meno male ca s’ addormètte ré subbito. Io veloce veloce spatriài rui pacchi re sale ‘ngimma a lo davanzale e chiuriètti la fernèstra. Pé la córa ré l’ uocchi però virietti n’ ombra ca si muvìa arrèto a lo ceràso. La uì lóco...stai venènno ! ...pensai. Ma qua nó trasi brutta strega...sta brutta Ianàra.... assióglia re contà fino a crai matìna !

Chiano chiano aprietti la porta re la stanzia e spatriài l’ ati tre pacchi ré sale roppio... chiuriètti e mentre mi ìa a corcà pensai : cónta... cónta... ara fà iuòrno annandi a ssa porta !

Mi ‘nfilài sotta a ré coperte ma l’ uócchi non ne ulìano sapé ré si chiure, e l’ avrécchia nonn’ erano mai state accussì appizzàte; mai sintùti tanti rumùri ré notte rindo a quéra casa. Ma io era piccirìllo e chiano chiano l’ uócchi si chiurièro.

Mi rescetào no rumore r’ acqua ca scurrìa. Aprietti l’ uocchi e biriètti ca fóre nó chiuìa... non ‘ng’era na nuvola... sulo ‘na luna chiena. LA LUNA CHIENA ! Rindo a n’ attimo mi passào lo suonno e mi trovài zezzàto miezzo a lo lietto. Uardài  la porta e biriètti ca ra sotta trasìa acqua. Capiètti subbito ! La Ianàra invece re si mette a contà ró sale, menàva acqua pé lo squaglià !

L’ allùcco ca menài.... e chi se lo scorda chiù !

Rindo a n’attimo arrivàro tutti rindo a la stanzia, có li pieri ‘nfussi, ca s’era rutto nó tubo re l’ acqua.

Quera notte puro nonno Tóre se l’ è arrecordàta pé parecchio tiempo...roppo ca contài tutto a mamma !!!